អង្គ​ការ​​​សង្គម​ស៊ីវិល​​រៀបចំ​​​​ពិធីអបអរ​សាទរ​​​ទិវា​សិទ្ធិ​មនុស្ស​អន្តរ​ជាតិឆ្នាំ​២០១១

ដោយ​ ៖ ប្រុសកោះ
ថ្ងៃសុក្រ ទី៩ ខែធ្នូ ឆ្នាំ២០១១ ម៉ោង ១៧:០៣

យោងតាម​​​​​​ការ​ប្រកាស​ព័ត៌​មាន​​ថ្ងៃទី៩ ធ្នូ ​​បាន​ឱ្យ​ដឹង​ថា ​​នា​ថ្ងៃ​សៅរ៍ ទី១០ ធ្នូ នឹង​មាន​តំណាង​​មកពី​​ស្ថាប័ន​​ព្រឹទ្ធ​សភា​​​​ រដ្ឋសភា​​ រាជ​រដ្ឋា​ភិបាល​កម្ពុជា ​​អង្គ​ការ​សហប្រ​ជាជាតិ​ តំណាង​ស្ថានទូត​​​នានា​ប្រចាំ​​កម្ពុជា ​​អង្គ​ការ​​ សមាគម​ជាតិ អន្តរជាតិ សហ​ជីពកម្មករ ​​សហគមន៍​​​ជ​នជាតិ​​ដើមភាគតិច ​យុវ​ជន ​​សិស្ស​ និស្សិត ​​​ដែលសរុប​ប្រមាណ​ជា​៤០០០​នាក់​​នឹង​មកជួប​ប្រជុំគ្នា ដើម្បីប្រារព្ធ​​​​ទិវា​​​​សិទ្ធិ​មនុស្ស​​​​អន្តរជាតិ​​ខួប​លើកទី​៦៣ ​​​នៃសេចក្តី​ប្រកាស​ជា​សាកល​ស្តីពីសិទ្ធិ​​​​មនុស្ស​(១០ ធ្នូ ​១៩៤៨-១០ ធ្នូ ២០១១)​​នៅទីធ្លា​​​សួន​​សេរីភាព ​​​​ជិត​ផ្សារ​ចាស់នៃ​រាជ​ធានីភ្នំពេញ ​​ចាប់ពីម៉ោង​​៦ និង​៣០នាទី​​ព្រឹក​​ដល់ម៉ោង​៤ និង​៣០នាទី​រសៀល ។ ការ​រៀបចំ​​នេះ ធ្វើឡើង​​ក្រោម​ប្រធាន​​​បទ​រួមស្តីពី «ប្រព័ន្ធ​​តុលាការ​​ឯករាជ្យ ​និង​សេរីភាព​​ក្នុង​ការបញ្ចេញ​មតិ គឺជាមូលដ្ឋាន​​​គ្រឹះ​នៃ​​​យុត្តិ​ធម៌សង្គម និង​ការគោរព​សិទ្ធិមនុស្ស» ។

តាម​ការ​ប្រកាស​​ឱ្យ​ដឹង​ថា ​​នៅវេលាម៉ោង​៦ និង​៣០នាទី​ព្រឹក​នា​ថ្ងៃ​ដដែល ​នឹង​មាន​ការដើរ​​​ដង្ហែ​​​ក្បួន​ដោយ​​​សន្តិវិធី​​​ និងមាន​មនុស្ស​ចូលរួម​ប្រមាណ ២០០០នាក់​​ដោយចេញ​​​ដំណើរ​​​​ពីទី​ធ្លា​​​​​ខាង​មុខ​​​រដ្ឋ​សភា​ថ្មី ​ទៅរង្វង់​​​មូលសម្តេច​ព្រះ​​សង្ឃ​រាជ ជួន ណាត ​រួចបន្ត​ដំណើរ​​​តាម​​​តិរវិថី​ព្រះស៊ីសុវ​ត្ថិ ​កាត់តាម​​​សណ្ឋាគារ​​​​កាំបូឌីយ៉ា​​ណា រហូត​ដល់​វត្ត​ឧណ្ណា​លោម ​រួចបត់​​​​ឆ្វេង​តាម​​ផ្លូវ​​លេខ​១៥៤ ហើយ​បត់​ស្តាំ​តាម​ផ្លូវ​​លេខ១៣ រួចធ្វើដំណើរ​​រហូត​ដល់​​រតនាគារជាតិ ហើយ​បត់​​ឆ្វេង​​តាមផ្លូវ​លេខ​១០៦ ​សំដៅ​ទៅកាន់​ទីកន្លែង​​​ប្រារព្ធ​​​ធ្វើពិធី​​នៅ​សួន​សេរី​ភាព​​ (ទីលាន​​ប្រជា​​ធិបតេយ្យ) ​ជិត​ផ្សារ​ចាស់។

វាគ្មិន​​សំខាន់ៗ​ដែលនឹងធ្វើ ​សុន្ទរកថា ​​នៅក្នុង​ពិធីនេះ​មាន​សម្តេច ​​ព្រះ​​មហិស្ស​រា នរោត្តម ​​ចក្រ​ពង្ស់ ​​​ព្រះ​រាជតំណាង​​ដ៏ខ្ពង់ខ្ពស់​​​របស់ព្រះមហា​ក្សត្រនៃព្រះរាជាណាចក្រ​ កម្ពុជា លោកជំទាវ​ម៉ែន ម៉ាលី ​​​ប្រធាន​គណ​ៈ​កម្មការ​ការពារ​សិទ្ធិ​មនុស្ស​​​ទទួលពាក្យ​​បណ្តឹង ​និងអង្កេត​​​នៃព្រឹទ្ធ​សភា​ ​​តំណាង​គណៈ​​កម្មាធិការ​​​សិទ្ធិមនុស្សកម្ពុជា​លោកសុរិយា ស៊ូប៊ែឌី ​​អ្នករាយការណ៍​​​ពិសេស​​របស់​​អង្គការ​​​សហប្រជាជាតិ​​ស្តីពី​​ស្ថាន​​ភាព​ សិទ្ធិ​​មនុស្ស​​​នៅកម្ពុជា ចំណាប់អារម្មណ៍​​​​របស់ Mr.James Heenan ប្រធាន​​ស្តីទី​ការិយា​ល័យ​​​នៃឧត្តម​ស្នង​ការ​អង្គ​ការ​សហប្រជាជាតិ​​ ទទួលបន្ទុក​​សិទ្ធិមនុស្សប្រចាំ​កម្ពុជា​​​ និង​ជា​​អ្នក​តំណាង​​​ភ្នាក់ងារនៃ​អង្គ​ការ​​សហប្រជាជាតិប្រចាំ​កម្ពុជា​ លោក Jeff Daigle ​ភារធារី​ស្ថានទូត​​​សហរដ្ឋ​អាេមរិក​​ប្រចាំ​កម្ពុជា​​​​ លោក​ Mark  Gooding ឯកអគ្គ​រាជទូត​អង់គ្លេស​ប្រចាំ​​កម្ពុជា ​និង​ជា​ប្រធានសហគមន៍​​អឺរ៉ុប​ប្រចាំ​កម្ពុជា​​​​ លោក Christian Connan ឯ​កអគ្គ​​រដ្ឋទូត​បារាំង​ប្រចាំ​កម្ពុជា​ លោក​ធន សារាយ ​ប្រធាន​​​សម្រប​សម្រួល​​គណៈ​​​កម្មាធិការ​ប្រព្រឹត្តិកម្មនៃ​អង្គ​ការ​​​​ សមាគម​ការពារសិទ្ធិ​មនុស្ស​​​កម្ពុជា (CHRAC) ​និង​ជា​ប្រធាន​សមាគម​អាដហុក (ADHOC) ​លោក​ឈិត សំអាត ​​នាយក​ប្រតិបត្តិ​​​​វេទិកា​នៃ​​អង្គការ​មិន​មែនរដ្ឋាភិបាល​​ស្តីពី​ កម្ពុជា​​​​ លោក​អាត់ ​ធន់ ​ប្រធាន​សហភាព​​ការងារកម្ពុជា​​​ និង​ លោកស្រី​​ណាត់ ភៀក ​តំណាង​​​សហគមន៍​ជន​ជាតិ​ដើមភាគតិច​មកពីខេត្ត​រតនគិរី ។

ព្រឹត្តិការណ៍​​​នេះ​ត្រូវបានរៀបចំ​ឡើង​ដោយ​គណៈ​ កម្មាធិការ​ប្រព្រឹត្ត​ិកម្ម នៃ​អង្គការ​​សមា គម​ការពារ​​សិទ្ធិ​​មនុស្សកម្ពុជា (CHR-AC)ដោយ​​​​សហការ​ជាមួយ​​​​នឹង​ក្រុម​​សម្ព័ន្ធ​អង្គការ សមាគម ​ចំនួន២១ និងអង្គការ​ជាតិ-អន្តរជាតិមួយចំនួនផ្សេងទៀត​​ ​រួមទាំងសហភាព​​ សហជីព​ កម្មករ​ ​ដែលកំពុង​​ធ្វើការ​នៅក្នុង​ព្រះ រាជាណាចក្រ​កម្ពុជា​ផង​ដែរ ៕