នៅពេលទៅដល់ទីលានប្រជាធិបតេយ្យនោះ ក្រុមយើងបានសង្កេតឃើញ ប្រជាពលរដ្ឋកំពុងទ្រហោយំ ស្រែកទាមទារសំណងសមរម្យនិងយុត្តិធម៌តាមផ្លូវច្បាប់សម្រាប់ការបូមដីលុបលំនៅដ្ឋានរបស់គាត់។
អ្វីដែលយើងបានឃើញ ហើយធ្វើឲ្យយើងរន្ធត់តក់ស្លុត ក្ដុកក្ដួលបំផុតនោះគឺកុមារតូចៗ អាយុប្រមាណជាមួយឆ្នាំជាងទៅពីរឆ្នាំ ឬបីឆ្នាំក៏កំពុងតែស្ថិតនៅក្នុងចំណោមចាស់ៗដែលកំពុងយំយែក បង្ហូរទឹកភ្នែកទាមទារសំណងសមរម្យនិងយុត្តិធម៌នោះដែរ។ ប្រសិនបើក្រុមហ៊ុនពិតជាមិនផ្ដល់សំណងសមរម្យនិងយុត្តិធម៌ ដល់គាត់និងអ្នកស្រុកបឹងកក់ដទៃទៀតទេ នោះមិនដឹងថាកុមារតូចៗដែលមិនដឹងអីសោះហើយមកទទួលរងការបណ្ដេញចេញពីលំនៅដ្ឋានដែរនោះ នឹងមានវាសនាយ៉ាងណានោះទេ។
ថ្វីត្បិតថា អ្នកស្រុកបឹងកក់ដែលទទួលរងការបណ្ដេញចេញនោះ បាននាំគ្នាទាមទារសុំសម្ដេចហ៊ុន សែនជួយដោះស្រាយសំណងសមរម្យនិងយុត្តិធម៌អស់រយៈពេលបីថ្ងៃមកហើយក៏ដោយ ក៏រហូតមកដល់ពេលនេះគ្មានអាជ្ញាធរ ឬក្រុមហ៊ុនពាក់ព័ន្ធណាចុះមកដោះស្រាយនៅឡើយ។
អ្វីដែលគួរចាប់អារម្មណ៍នោះគឺ អ្នកភូមិបឹងកក់ដែលកំពុងនាំគ្នាយំយែកសុំដំណោះស្រាយសមរម្យនិងយុត្តិធម៌នោះ បាននិយាយថា មានអាជ្ញាធរមកនិយាយថា ពួកគាត់ត្រូវគេជួលឲ្យមកសម្ដែងល្ខោនធ្វើជាយំទាមទារបែបបនេះ (sic!!!)។
មិត្ត១០ធ្នូជឿថា ប្រសិនបើក្រុមអាជ្ញាធរខ្លួនឯងឬមានបងប្អូនរបស់គាត់ទទួលរងនូវការបណ្ដេញចេញដោយគ្មានសំណងសមរម្យនិងយុត្តិធម៌តាមផ្លូវច្បាប់បែបនេះ នោះពួកគាត់ពិតជាពិចារណាអ្វីដែលគាត់បាននិយាយនោះឡើងវិញជាមិនខាន នេះប្រសិនបើអាជ្ញាធរពិតជាបាននិយាយបែបនោះមែន។
ទីណាមានយុត្តិធម៌សង្គម ទីនោះមានសន្តិភាព ប្រជាពលរដ្ឋរស់នៅដោយសុខសាន្ត!
មិត្ត១០ធ្នូ
No comments:
Post a Comment