ទិវាសិទ្ធិមនុស្សអន្តរជាតិ ១០ ធ្នូ ២០១០
សេចក្ដីប្រកាសព័ត៌មាន
យើងទាំងអស់គ្នាត្រូវការយុត្តិធម៌ និង ជីវភាពសមរម្យ
ការប្រារព្ធទិវាទាំងអស់នេះមានពាក្យស្លោករួមមួយគឺ “យើងទាំងអស់គ្នាត្រូវការយុត្តិធម៌ និង ជីវភាពសមរម្យ” និងមាននិមិត្តសញ្ញារួមមួយគឺ “ក្រមាពណ៌ខៀវ ”ដើម្បីតំណាងឱ្យតួនាទីដ៏សំខាន់របស់អ្នកការពារសិទ្ធិមនុស្សនៅក្នុងប្រទេសកម្ពុជា។
ការផ្ដួចផ្ដើមគំនិតរបស់សហគមន៍នេះ មិនត្រឹមតែបង្ហាញនូវសមិទ្ធិផលទាំងឡាយ ដែលសម្រេចបានក្នុងវិស័យសិទ្ធិមនុស្សនៅប្រទេសកម្ពុជាប៉ុណ្ណោះទេ ប៉ុន្តែក៏ផ្ដោតលើបញ្ហាសំខាន់ៗមួយចំនួនផងដែរ ដែលប្រជាពលរដ្ឋកម្ពុជានៅតែប្រឈមមុខនៅឡើយ ដូចជាការកេងប្រវ័ញ្ចលើដីធ្លី ធនធានធម្មជាតិ ការរឹតបន្តឹងលើសេរីភាពនៃការបញ្ចេញមតិ ការជួបជុំ និងការប្រមូលផ្តុំ ព្រមទាំងការរំលោភបំពានទៅលើសិទ្ធិការងារ។
ទិវាសិទ្ធិមនុស្សអន្តរជាតិ ត្រូវបានប្រារព្ធឡើងជារៀងរាល់ឆ្នាំនៅថ្ងៃទី១០ ខែធ្នូ ដើម្បីជាការរំឭកនូវការតស៊ូ ពុះពារប្រឆាំងនឹងការរំលោភសិទ្ធិមនុស្សដែលបន្តប៉ះពាល់ដល់សង្គម និងសហគមន៍ស្ទើរតែគ្រប់ប្រទេស។ ទិវាសិទ្ធិមនុស្សអន្តរជាតិគឺជា ការលើកឡើងឱ្យបានជ្រួតជ្រាប នឹងធ្វើជាសក្ខីភាពចំពោះ ការរំលោភសិទ្ធិមនុស្សព្រមទាំងក្រោកឈរដើម្បីអំពាវនាវឱ្យមានការចាត់វិធានការនានា។
ការប្រារព្ធទិវាសិទ្ធិមនុស្សអន្តរជាតិ ក៏ជាការរំលឹកផងដែរ នូវឱកាសនៃអង្គការសង្គមស៊ីវិល រដ្ឋាភិបាល អង្គការអន្តរជាតិនិងប្រជាពលរដ្ឋគ្រប់ស្រទាប់ក្នុងការខិតខំប្រឹងប្រែង ជាច្រើន ដើម្បីធានាបាននូវការទទួលស្គាល់ និងការប្រតិបត្តិតាមគោលការណ៍សិទ្ធិមនុស្សជាមូលដ្ឋាន។
គំរូនៃការប្រារព្ធនិងសកម្មភាពមួយ ចំនួននៅថ្ងៃទី១០ ខែធ្នូ ឆ្នាំ២០១០
- ប្រជាពលរដ្ឋប្រមាណជា ប្រាំរយនាក់និងសហគមន៍នេសាទ នឹងជួបជុំគ្នានៅភូមិកងសាវ ឃុំផាត់សណ្ដាយ ខេត្តកំពង់ធំ ដើម្បីប្រារព្ធពិធីប្រណាំងទូក និងបង្ហោះប៉ោងប៉ោង។
- អ្នកចូលរួមប្រមាណជាងមួយពាន់នាក់ មានដូចជា អ្នករត់ម៉ូតូឌុប អ្នករត់ម៉ូតូរ៉ឺម៉ក អាជីវករ អ្នកបម្រើការងារ ក្នុងភោជនីយដ្ឋាន នឹងចូលរួមពិធីដើរក្បួន និងកិច្ចពិភាក្សាតុមូល ស្ដីពីបញ្ហាសិទ្ធិមនុស្ស ដែលនឹងធ្វើការចាក់ផ្សាយតាមស្ថានីយវិទ្យុខេត្តសៀមរាប។ ប្រជាពលរដ្ឋប្រមាណជាងពីររយនាក់នឹងចូលរួមក្នុងវេទិកាសាធារណៈ ស្ដីពីការឆ្លងដែនដោយសុវត្ថិភាពនៅខេត្តបន្ទាយមានជ័យ។
- ប្រជាពលរដ្ឋប្រមាណជាង ពីររយហាសិបនាក់នឹងប្រារព្ធពិធីជួបជុំជាសាធារណៈស្ដីពីបញ្ហាសិទ្ធិមនុស្ស និង ការដាក់បញ្ចាំងវីដេអូស្ដីពីសិទ្ធិមនុស្សនៅក្នុងឃុំ ល្អាង ខេត្តកំពត។
- សិស្សនិស្សិតប្រមាណជាង ហាសិបនាក់នឹងជួបជុំគ្នានៅការិយាល័យបណ្ដាញយុវជនកម្ពុជានៅទីក្រុងភ្នំពេញ និងជិះកង់ឆ្ពោះទៅស្ពានច្បារអំពៅ វិមានឯករាជ្យ និងទីលានសួនសេរីភាព ដើម្បីចែកខិត្តប័ណ្ណដល់ប្រជាពលរដ្ឋ ហើយដាក់លិខិតស្ដីពីបញ្ហារបស់យុវជនទៅកាន់រដ្ឋសភានៅទីក្រុងភ្នំពេញ។
- មនុស្សប្រមាណជាង ហាសិបនាក់ដែលជាសមាជិកក្រុមគ្រួសារកសិករ អ្នកដឹកនាំសហជីព សិស្សនិស្សិត សិល្បករ និងបុគ្គលិកអង្គការមិនមែនរដ្ឋាភិបាលនឹងនាំយកនូវកញ្ចប់ម្ហូបអាហារ និងសួរសុខទុក្ខ អ្នកការពារសិទ្ធិមនុស្ស ចំនួន៣៨ នាក់នៅតាមពន្ធនាគារក្នុងរាជធានីភ្នំពេញ និងតាមបណ្ដាខេត្តចំនួន ៦ទៀត។
- ប្រជាពលរដ្ឋប្រមាណជាង ប្រាំពីររយនាក់ រួមមានអ្នកភូមិ សិស្សនិស្សិត កងរាជអាវុធហត្ថ អភិបាលស្រុក អាជ្ញាធរមូលដ្ឋាន និងវាគ្មិន ជាច្រើននាក់ទៀតនិងចូលរួមក្នុងទិវាសិទ្ធិមនុស្សអន្តរជាតិនេះនៅក្នុងស្រុកស្នួល ខេត្តក្រចេះ។
- អ្នករត់ម៉ូតូរ៉ឺម៉ក និងអ្នករត់ម៉ូតូឌុបប្រមាណជាង ពីររយនាក់នឹងដង្ហែក្បួនរួមគ្នានៅក្នុងខេត្តព្រះព្រះសីហនុ។
- ប្រជាពលរដ្ឋប្រមាណជាងមួយពាន់នាក់នឹងចូលរួមក្នុង ការប្រគំតន្ត្រីនៅខេត្តសៀមរាបដែលនឹងត្រូវរៀបចំឡើង ដោយក្រុមយុវជននាំសារ។
កញ្ញា ណាលី ពីឡូក នាយិកាអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ មានប្រសាសន៍ថា “យុត្តិធម៌ត្រូវតែផ្ដល់ជូនចំពោះប្រជាពលរដ្ឋក្រីក្រ និងប្រជាពលរដ្ឋទន់ខ្សោយ ហើយច្បាប់ត្រូវតែអនុវត្តឱ្យបានស្មើគ្នា ចំពោះអ្នកក្រីក្រ អ្នកមានអំណាច និងអ្នកមានទ្រព្យធន”។ កញ្ញាបានបន្តទៀតថា “ប្រជាកសិករក្រីក្រមានសិទ្ធិដូចគ្នានឹងអ្នកមានទ្រព្យធនដែរ។ តុលាការកម្ពុជាខកខានមិនបានផ្ដល់យុត្តិធម៌ជូន ជនរងគ្រោះដែលត្រូវបានរំលោភបំពាន និងកេងប្រវ័ញ្ចសិទ្ធិរបស់គាត់។ កំណែទម្រង់ប្រព័ន្ធតុលាការ គឺជាតម្រូវការចាំបាច់ដើម្បីពង្រឹងឯករាជភាព និងវិជ្ជាជីវៈរបស់តុលាការ និងដើម្បីលុបបំបាត់អំពើពុករលួយ”។
លោក យ៉េង វីរៈ នាយកប្រតិបត្តិនៃមជ្ឈមណ្ឌលអប់រំច្បាប់សម្រាប់សហគមន៍មានប្រសាសន៍ថា “យើងសូមស្វាគមន៍ ចំពោះការអភិវឌ្ឍន៍ ប៉ុន្តែត្រូវគិតដល់ផលប្រយោជន៍អ្នកក្រីក្រផងដែរ។ ត្រូវតែបញ្ឈប់ការបណ្ដេញដោយបង្ខំទាំងឡាយ និង ត្រូវមានគោលនយោបាយដែលធានានិង ជំរុញការចូលរួម និងសិទ្ធិទទួលព័ត៌មានសិទ្ធិខាងការបញ្ចេញមតិ និងសេរីភាពក្នុងការដើរឆ្ងាយជិត”។
មិត្ត១០ធ្នូ គឺជា ក្រុមមិនផ្លូវការមួយដែល ផ្ដល់ការគាំទ្រ និងជួយក្នុងការផ្ដួចផ្ដើមគំនិតដើម្បីប្រារព្ធ ទិវាសិទ្ធិមនុស្សអន្តរជាតិ ទូទាំងប្រទេសកម្ពុជា។
ប្រព័ន្ធសារព័ត៌មានទាំងអស់ ត្រូវបានអញ្ជើញឱ្យចូលរួមក្នុងការប្រារព្ធទិវាសិទ្ធិមនុស្ស១០ ធ្នូ និងសូមធ្វើការទំនាក់ទំនងទៅមនុស្សសំខាន់មួយចំនួនដែល មានក្នុងបញ្ជីតារាងសកម្មភាព ដែលនឹងត្រូវប្រារព្ធនៅទីក្រុងភ្នំពេញ និងបណ្ដាខេត្តផ្សេងៗទៀត។
No comments:
Post a Comment