ក្រុមហ៊ុន​ថូល (Toll Group) ដក​ខ្លួន​ពី​​គម្រោង​​​​​ជួសជុល​និង​កសាង​​ផ្លូវ​ដែក​នៅ​កម្ពុជា

តាម​ប្រភព​គួរ​ឲ្យ​ទុក​ចិត្ត​មួយ​ពី​ប្រទេស​​កម្ពុជា​បាន​ឲ្យ​ដឹង​ថា ក្រុមហ៊ុន​ថូល ដែល​ជា​ក្រុមហ៊ុន​មួយ​របស់​ប្រទេស​អូស្ត្រាលី​នឹង​ត្រូវ​ដក​ខ្លួន​ចេញ​ពី​គម្រោង​​​ជួស​ជុល​និង​កសាង​​ផ្លូវ​ដែក​កម្ពុជា ដ៏​ចម្រូង​ចម្រាស់​ដែល​ត្រូវ​ចំណាយ​​ប្រាក់​១៤៥​លាន​ដុល្លារ។

យោង​តាម​កិច្ច​ព្រមព្រៀង​មួយ​ដែល​បាន​ចុះ​ហត្ថលេខា​​នៅ​ឆ្នាំ​២០០៩ ក្រុម​ហ៊ុន​ថូល និង​​​​​ក្រុម​ហ៊ុន​​​កម្ពុជា​​ត្រូវ​ដំណើរការ​គ្រប់​គ្រង​​​ផ្លូវ​ដែក​នេះ​រយៈ​៣០​ឆ្នាំ។

គម្រោង​ ដែល​​ទទួល​បាន​មូលនិធិមួយ​ផ្នែក​ពី​ភ្នាក់ងារ​អភិវឌ្ឍន៍​អូស្ត្រាលី បាន​បណ្ដាល​ឲ្យ​មាន​​​​ការ​តវ៉ា​​ ពី​​​​ប្រជាពលរដ្ឋ​​៤០០០​នាក់​​​ដែល​​​រស់​នៅ​តាម​សងខាង​​​ផ្លូវ​រថ​ភ្លើង ដែល​មិន​ទទួល​បាន​សំណង​សមរម្យ​ ជា​ថ្នូរ​​ឲ្យ​ពួក​គាត់​ចាក​ចេញ។ អ្នក​នាំ​ពាក្យ​​របស់​ក្រុមហ៊ុន​ថូល​​បដិសេធ​មិន​អធិប្បាយ​​អ្វី​ទេ។

ការ​​ជួសជុល​និង​កសាង​ផ្លូវ​រថភ្លើង​ពីរ​ខ្សែ​ដ៏​ចាស់​ទ្រុឌទ្រោម​​ដែល​តភ្ជាប់​ពី​រាជធានី​ភ្នំពេញ​ទៅ​កំពង់​ផែ​ភាគ​ខាង​ត្បូង​ និង​តភ្ជាប់​ពី​រាជធានី​ភ្នំ​ពេញ​ទៅ​ព្រំ​ដែន​ថៃ​នៅ​ភាគ​ខាងលិច​នៃ​ប្រទេស​កម្ពុជា មាន​សារសំខាន់​ជា​យុទ្ធសាស្ត្រ​​សម្រាប់​ប្រទេស​នេះ។

គម្រោង​ជួសជុល​​និង​កសាង​ផ្លូវដែក​ទាំងពីរ​នេះ​គឺ​ជា​ផ្នែក​នៃ​​គម្រោង​បណ្ដាញ​ផ្លូវ​ដែក​អន្តរជាតិ​ ដែល​​តភ្ជាប់​​ប្រទេស​សិង្ហបុរី និង​ប្រទេស​ចិន​ដោយ​ឆ្លង​កាត់​ប្រទេស​ថៃ ម៉ាឡេស៊ី និង​ប្រទេស​វៀតណាម។

ក្រុមហ៊ុន​ថូល​បាន​ចុះ​កិច្ច​សន្យា​រយៈ​ពេល​៣០​ឆ្នាំ​​ដើម្បី​រួម​ទុន​ជាមួយ លោក​ គិត ម៉េង តាម​រយៈ​ក្រុមហ៊ុន​រ៉ូយ៉ាល់​គ្រូប របស់​លោក​ដែល​​ជា​​អ្នក​ជំនួញ​ខ្មែរ​មួយ​រូប​មាន​ខ្នង​ក្រាស់​។

កាល​ពី​ខែ​វិច្ឆិកា​ ឆ្នាំ​កន្លងទៅ​នេះ ក្រុមហ៊ុន​ផ្សព្វផ្សាយ ហ្វ៊ែរ​ហ្វែក្ស ម៉េឌាបាន​រាយការណ៍​ថា ក្មេង​ស្រី​អាយុ​១៣​ឆ្នាំ​ម្នាក់ និង​ប្អូន​ប្រុស​អាយុ​៩​ឆ្នាំ​របស់​នាង​ម្នាក់​បាន​លង់​ទឹក​ស្រះ​យ៉ាង​ជ្រៅ​បណ្ដាលឲ្យ​​ស្លាប់ ៤​ថ្ងៃ​ក្រោយ​ពី​គ្រួសារ​របស់​នាង​ត្រូវ​​រដ្ឋាភិបាល​បណ្ដេញ​ចេញ​ពី​លំនៅឋាន និង​ត្រូវ​បញ្ជូន​​​ទៅ​​​រស់​នៅ​ទីលំនៅ​ថ្មី​​ ដើម្បី​​គម្រោង​ចាប់​ផ្ដើម​​​ជួស​ជុល និង​​កសាង​​​​ផ្លូវ​រថភ្លើង​នេះ​ឡើងវិញ៕